治癌的另類療法？不了。

最近有位朋友的老婆在治癌的過程中死去，本來亦沒需要寫出來，但係畢竟佢的死可能因為唔正確的想法及選擇而提早，而且事件起因而是在網絡上發生的關係，最後修改一下就決定發佈。

重要的事情除左講三次之外，也可以一開頭就清楚講出來，免生誤會：呢篇講的唔係另一位老婆岩岩因癌病去逝的網友，想抽水呀/講是非呀/看圖/看文字作文的/想幫拖想擦好感度的唔該慳翻啖氣。

拿，件事簡單講就係有個人的老婆有左癌病，咁原本個老公都好好地用「正統」西方醫學院的方法去醫。但正係事情無立即好轉的時候，個老公真係連黃大仙都去問埋。（1）然後，有一日佢見到(網上?)朋友叫佢老婆去試下香港某處的一D 另類療法，兼又有唔少人附和話不如一試。其實另類療法都有唔少，佢去見的係屬於一種自然療法。詳細係點樣療就唔詳細講了。我跳住黎講啦-

講結果：佢老婆死左。佢地屋企人告緊個個「賣」另類療法療程的醫生。叫做報左警，搵左專業人士搞緊。但大家估計告得入機會不大，甚至連停牌停業都唔洗。

重點有幾個，希望有緣睇到呢篇文的人可以自己諗諗，唔好見到其他人講點得點得就信（咁似講緊其他範疇的野？）：

• 有人用西方醫學院正統方法醫好，亦有人醫唔好。有人完全唔食藥亦有案例好返，當然亦有人死。更甚者，如果有人肯去試，我相信大量只飲符水的患者當中，也有一些會好返，當然也有一部份會死去。
• 大部份（如非絕大部份）的另類療法的效果也沒有經過科學方法檢測，而證明有顯注效果。甚至乎有些方法連做過檢測的文獻也沒有。如果硬係要問底線係邊？咁雙盲可以係其一。
• 有部份另類療法會要求試用者停用其他藥物。如果有呢個情況，咁就要諗真D。(2) 而今次的主角亦正好停左藥去試呢種治癌的另類療法
• 呢個係乜野玩法？假想有人宣稱有種新人類大法，每天空肚食早餐，只要每天天明前去野外地方吸收天地靈氣作早餐用，自然會有不藥而癒，但講到明同時食其他藥會無效果，兼要你簽下自願書講明自己只同一時間用上新人類大法作治療。咁假設有100 個人黎試呢種新人類，同後有廿個人好返，大師就可以對外講有唔少例子係只同一時間用佢的新人類大法就已經醫好癌病。哇，咁教人呢種大法仲唔發過做BLOGGER Youtuber？
• 如果你或者身邊的人因為見到有遵從西方醫學而醫唔好的例子，又應否直接去幫襯另類療法甚或至各種東南亞/非洲巫醫呢？

另外，我花幾個鐘頭寫呢篇文為乜？我不禁諗：呢篇文對其他人的益處/效果係咪會好過D 半分鐘打一兩行字的網上留言？網上的野究竟有幾多真幾多流？

歡迎各位有治癌或其他病的另類療法經驗的朋友留言。

/呢篇寫得唔好，中間有段寫得不通順，但沒心情修改，請自行同情地理解吧/

（1）：真人真事，照講。非抽水。主要係想形容佢當時的絕望同六神無主，因為佢老婆係天主教徒，佢中學時亦係讀教會學校。

（2）：有一位親人因而突然中風。我認為賣藥水9人都算，叫人停左食醫生開要長期服用的藥真係CLS。