唔係收租仔無 ML？記一個替代戶口

近日忙於讀閒書，格左幾日無寫文，今日讀到 Life of R 的 〈妙用Margin／ML 減低利息支出〉，文中提到在IB 用margin ACCT 借錢，同時把錢放到Mortgage Link （ML）戶口中套利，又學到野。但係，唔係個個都係收租仔有層樓要供，又或者以前真係無開埋ML 呢？

原來開個投資/投機公司戶口都可以！呢間公司為戶口中的現金提供5% p.a. 利息，每月月頭按上個月的每日平均結餘 X 5% X 上月日數/ 365 黎派息。呢個高息戶口我就用左幾年，上限可以放40 萬黎收息，中意係個度做投資/投機/賭又得，唔做齋放錢係度收住5% 息亦得，得左！（見附圖）

咪掛左計期望值至得，咁中間有乜風險？佢寫到明：

「XXXX有限公司是一間提供場外黃金/白銀保證金交易的經紀商，並非《銀行業條例》(第155章)所定義的接受存款公司，及不受香港金融管理局監管。」

姐係投資戶口的錢唔包係存款保證計劃入邊。
不過，係銀行的錢係獨立存放：

「所有客戶資金均存放在XXXX有限公司於銀行開立的個別客戶賬戶之內，該賬戶獨立於XXXX有限公司的公司賬戶。」

但大家應該明白，出事時往往就係D 大家都好啖定的地方中招。所以岩唔岩大家用就要自行因應自身情況黎衡量！自己功課自己做，我的黃金對其他人可能只係屎，調轉亦可，哈哈~

而佢母公司呢？同IB 一樣都係係美國上市。我曾經都有諗過佢出事點算，係咪要沽空佢間公司的股票對沖下。但係呢間上市公司又無出OPTION，無得LP 佢，咁唯有算數，一動不如一靜，靜靜雞月月收息算。

如是者，用R's 方案三的例子，回報率可以由原本ML 戶口得10.3% 進一步提升至11.8% 。當然，實際操作上如要放入100 萬便需要出動全家三個人開戶口。

但係呢個時候就可以再玩埋“親朋好友推廣計劃”，自己開左戶口之後，再安排兩個人頭戶口開戶同做夠TRADE，咁就可以再食多2 個人頭 X 1600 HKD/HEAD X 2 (你同"朋友"各一份）= 6400 HKD，回報率到一步提高。（附圖2）

下篇唔寫呢D 咁正經的搵錢野，寫返8 掛野先~~~
多謝你花時間睇完。


附圖：

附圖2：

向70兄致敬之作：財類卜架可以點搵食？（燒春袋系列之一）

因為係70兄開左頭無畏無懼咁寫邊個真邊個假，真係值得向佢致敬。又時值奧運，當年有BLOG 界傳火棒，大家跟TOPIC 寫再TAG 人，呢篇就當係接佢「BLOGGER 的真假與搵食」而寫的吧。
===
拿，阻人搵食要落地獄燒春袋架！但係既然要寫一直走來在網路上的所見所聞，呢個系列就真係走唔甩。

呢個BLOGGER 係好多年前就係YAHOO 知識答問題上位，之前幾年前開左個財類BLOG。通常大大篇又長又臭的寫個股文章，仲會連續幾年每年寫過百篇。但係近兩年個BLOG 已經少左好多文，點解，聽聞係轉營去開臺係CHAT GROUP 「交流」WO。

呢D 股票臺通常就咁玩：臺主開BLOG 造起個場後，會聯同D 親兵跟班一齊搞好氣氛。個呀頭係臺度推股票，之後有升個D 就不斷提完又提，造勢造到非常有料咁。幾隻成功案例後，入左GROUP 的人又不斷介紹更多的人入黎。有時就搞下BBQ、做運動、食飯等等的同FANS 交流活動。搞到有幾百人跟呀頭行事，可以一呼百應的時候會點呢？

有個朋友的屋企就係鄉下D 三線城市開左間士多，諗住做下D 正當的小生意。開張都唔夠三日，就有人搵上門，同佢講：拿！正價的青島啤來貨就四文支，我呢度有D 貨就只要一文支，你都拎D 貨黎賣啦~ 哦，原來係大陸跟本唔駛知要去邊度先搵到假貨黎賣，D 造假貨的廠自然會搵行街出去搵客黎SELL。個GAME 就係咁玩。

返黎香港，咁呢類有幾百FANS（後面無入臺而跟住買的加埋可能過千），一呼百應隨時加加埋埋可以入幾千萬貨的臺主又可以點搵錢呢？如果有睇開湯財講港股千五隻入邊，至少有一半約柒百隻係無投資價值。咁呢柒百隻要炒起後搵人接貨，做成財富轉移，可以點做？

咁當然，真推假推有時混合起來，一時三刻又點知道呢D 臺主係真有料同想同人交流定係為搵水魚而開臺開BLOG 呢？呢個有機會再講吧。

另外的玩法有開公司搵人一齊投資、開收費班、收費臺、收乜乜中介費、做顧問、搞APPS 收廣告費等，順便又再提升人氣引多D人落黎。

咁近年可以點玩？請留意燒春袋系列之二，下回分解。

===
至於呢位係邊個？我只能夠講，佢曾經係一位BLOGGER 度留言希望互LINK 加人氣，但係俾個位BLOGGER 立過下後以兩BLOG 唔太同路而回絕。

留名等睇70兄估度。：）

[未寫第二回，應該好難估啦！]

積微錄與讀研二三事 [初稿]

第一篇，實在不想一開始寫就非要得罪人不可。很自然的選了池裡漁--池兄的BLOG 積微錄作介紹。池兄給我的感覺像位前輩大俠，天天遇上伸手黨也恰當的以禮相待，遇有後學不明所以之處，也樂意指點。

緣起（不可思議）：
為甚麼我會想到介紹他的BLOG 呢？說來卻是有些巧合。大概是讀法國大師掌門人的合夥人一書時，讀到一註提及William Poundstone 的一本舊作Fortune's Formula。再一找谷歌大師問路時便找到池兄的BLOG。
然而，在讀〈窮查理的普通常識〉前，我便機緣地在多年讀過〈FF〉這本奇書。那時在外地做Intern ，平日晚上常悶得發慌，便趁一次到市中心的書店時買書當解悶用。不知何故的選了這本書，讀時說是驚為天人也不為過，至少之後多年來也沒有太多書帶給我同樣的閱讀體驗。書中的讀後感就先按下不表，留待日後再慢慢寫。
還記得那年暑假Intern 歸港時和人看電影〈21〉，這電影剛好與書中甚是有趣一段有關。（FF，第二部）更重要的是這些燃點起我對種種博戲的研究。在大學讀書的幾年間，我當然有努力的玩物養志，幾乎沒有怎麼讀課程的書本和論文，反而花時間去研究Blackjack 和占星學起來，現在有時想起也覺荒唐。
那時從HKALL 借來全港八大的專書來讀，也忘了怎樣找到了經典的Thorp's Beat the Dealer，只記得我保存的是黑白印刷版。。，讀Kelly，也有讀戴子郎、馬凱文的。驚覺世界可以從另一個比較少人知的角度來看。
後來學到一點皮毛，「再用自己方法」！算是賺回點學費，也大概知道了有些人所說做到的回報，當中有多少來自EDGE 在長期的回饋，又有多少是來自剛好十鋪內開柒鋪字而已。
同時，從現實世界中的對奕中，也明白學術世界的另一面。也知道自己不可能適合在學術世界中生存。

寫到這裏，就要說個小小的故事，以補充下池兄寫的教授案，也算是和積微錄第二個交集。原本他在做的事外邊的人甚少知道、也沒想到用某方法「借」來優勢，如沒有這案這事兒聽過便算也不會寫出來。方法姑且不宜大談，也就談一件數十萬的小事。卻原來教授也要找幫手落盤做Trader，於是有同學就負責三/六/日開工。同學有次入飛跑完後對數，才發覺少了六位數，為甚麼呢？！一邊驚一邊查，才發現是自己手忙腳亂的一時大意打錯飛。坦白告訢教授後，竟像IBM 總經理般叫他下次小心便是，沒有加以打罵。這是我非常配服教授的地方。有份建設模型的參與者問另外一位建設者索回模型，真是聞所未聞之事。

積微錄是難能可貴的BLOG 界清泉，沒有大戰、沒有八卦，卻是喜歡讀想法特別的文章的好地方，因為你大概不會在另一處讀到相近的文章。在（財類）BLOGGER 間互想抄考、互想抬舉的今天，要介紹值得花時間由頭開始讀的BLOG 著實不多，積微錄卻是值得讀之再三，慢慢細味品嘗。
愚見認為，這BLOG 倒是適合深夜時先來杯威士忌，再邊抽大衛杜夫邊細讀池兄的文字。

[初寫於10-8-2016，未重讀修改，遇有別字錯字、不順句字、意義不明的段落，請見諒]

呢個BLOG 會寫乜？

由1998 年開始上網以來，經歷過唔少人和事；連網上世界都過左幾代的改變。NEWSGROUP 無人再用，寫日記的網站如HKFLASH，SHOWHAPPY，XANGA 都唔知去左邊；BLOG 興起再衰落，YAHOO BLOG 收皮，大多BLOGGER 四散；然後係FB 興起，寫手大多寫埋D 無乜養份的呃LIKE 文。

呢個BLOG 有兩個任務，其一會寫下過去同現在一些本地BLOGGER 的BLOG，當係介紹又好，緬懷又好。其二是寫D 我有興趣的野。其三係營救任盈盈。
暫時草擬左會寫的有十多位，都係一句：如有得罪，閣下自理，都無乜得點算，唔通起我底唱衰我咩。但開頭應該會寫下D 比較難得罪的幾位！

Hello, world!

營救任盈盈，XXXXX。
試猜「XXXXX」 五字為？